Clément MAROT : "Du beau tetin".

"DU BEAU TETIN







TETIN refait, plus blanc qu'un œuf,
Tetin de satin blanc tout neuf,
Tetin qui fais honte à la rose,
Tetin plus beau que nulle chose,
Tetin dur, non pas tetin voire,
Mais petite boule d'ivoire,
Au milieu duquel est assise
Une freze ou une cerise,
Que nul ne veoit, ne touche aussi,
Mais je gaige qu'il est ainsi ;
Tetin donc au petit bout rouge,
Tetin qui jamais ne se bouge,
Soit pour venir, soit pour aller,
Soit pour courir, soit pour baller ;
Tetin gauche, tetin mignon,
Tousjours loin de son compagnon,
Tetin qui portes tesmoignage
Du demeurant du personnage ;
Quand on te voit il vient à maints
Une envie dedans les mains
De te taster, de te tenir ;
Mais il se faut bien contenir
D'en approcher, bon gré ma vie,
Car il viendroit une autre envie.
O tetin ne grand ne petit,
Tetin meur, tetin d'appetit,
Tetin qui nuict et jour criez,
Mariez my tost, mariez !
Tetin qui t'enfles et repousses
Ton gorgias de deux bons poulces ;
A bon droict heureux on dira
Celuy qui de lait t'emplira,
Faisant d'un testin de pucelle
Tetin de femme entiere et belle."

Clément MAROT, Œuvres choisies... Paris : Ménard et Desenne, 1826 ; pp. 169-170 : c'est pas mignon ? ; )